Kryetarja e Kuvendit, Elisa Spiropali, mbylli vizitën zyrtare në Bullgari, me takime me Presidentin e vendit, Rumen Radev, dhe homologen Nataliya Kiselova, me fokus përshpejtimin e anëtarësimit të Shqipërisë në Bashkimin Evropian. Gjatë konferencës me homologen bullgare, Spiropali dënoi nismën e Presidentit të Serbisë, Aleksandër Vuçiç, për “botën serbe”, duke e cilësuar si shqetësim për rajonin. “Patjetër që çdo lëvizje e tillë që nuk sheh nga e ardhmja por reflekton retorikë dhe narrativë të së shkuarës shihet me shqetësim në Kosovë, Shqipëri dhe në rajonin tonë. Uroj të jetë kalimtare dhe ne të vijojmë me procesin e normalizimit të marrëdhënieve midis Kosovës dhe Serbisë me njohjen reciproke të vendeve dhe me proceset tona euroatlantike dhe integruese”. Marrëveshjen trepalëshe mes Shqipërisë, Kosovës e Kroacisë, Spiropali e quajti me rëndësi për gjithë rajonin. “Marrëveshja që ju përmendët bëhet në kuadër të planit strategjik të NATO-s. Pra, i gjithë koncepti strategjik i NATO-s e parashikon edhe bashkëpunimin rajonal në këtë nivel. Pra jo kundër kujt, por vetëm pro sigurisë në rajonin tonë”. Nga ana e tij, Presidenti Radev theksoi mbështetjen për anëtarësimin sa më shpejt të Shqipërisë në Bashkimin Evropian. “Plani juaj është edhe i yni”, tha kryeparlamentarja Kiselova duke shtuar se përveç mbështetjes politike, do t’i jepet edhe ndihmë teknike Kuvendit në procesin e integrimit.