Administrata e re amerikane që do të udhëhiqet nga Donald Trump nuk pritet të ketë ndikim të madh në Ballkanin Perëndimor. Sipas ish-ndërmjetësuese së dialogut mes Kosovës dhe Serbisë, Federica Mogherini, administrata në ardhje mund të shërbejë vetëm si përshpejtues i ndikimit të Bashkimit Evropian në këtë proces. “Sinqerisht, nuk mendoj se zgjedhjet në Shtetet e Bashkuara do të kenë një ndikim të madh në rajon. Mund të jem gabim dhe e di shumë mirë që në rajon ka pasur qëndrime të ndryshme për fushatën e tij dhe për zgjedhjen e tij. Edhe gjatë administratës së parë të Trump ka pasur një vazhdimësi që në thelb përkthehet në mbështetje për veprimet e Bashkimit Evropian në rajon” Megjithatë, Mogherini pret që udhëheqësia e re e Bashkimit Evropian të sjellë edhe zhvillime pozitive në procesin e dialogut. “Mund të ndodhë që me marrjen e detyrës nga lidershipi i ri në Bashkimin Evropian të ketë një rigjallërim të dialogut, ka shpresa që mund të japë impulse të reja për zhvillime pozitive në negociata” Administrata e re amerikane e dalë nga zgjedhjet e pesë nëntorit të këtij viti sipas ekspertëve pjesëmarrës në Konferencën e Sigurisë në Beograd do të fokusohet në Ukrainë, Lindjen e Mesme dhe në marrëdhëniet me Kinën. Tre elementet kryesore që shohim dhe që presim në Shtetet e Bashkuara të Amerikës dhe që janë të qarta janë që është Amerika e para dhe kjo vjen me strategji të politikës së jashtme, Kina vjen e dyta dhe fokusi e veprimet në raport me Kinën do të kenë një ndikim që ende mbase nuk mund ta pranojmë dhe Evropa vjen e treta. Ajo se çka pritet tani në Francë dhe Evropë është se rizgjedhja e Donald Trump do të krijojë shumë Trump të vegjës gjithkund. Ajo se çka shoh unë është kombinimi Trump, Musk, Vence, Thiel dhe fakti që këto zgjedhje u fituan nga dikush që ka promovuar identitet dhe dikush që ka promovuar një vizion të botës së ardhme dhe që është vështirë e kuptueshme për Evropën. Në konferencën e Sigurisë së këtij viti në Beograd tema bosht është “Në mbrojtje të njerëzimit”, ku në panelin e parë u diskutua për ndikimin në rajon dhe botë të zgjedhjeve të SHBA-së dhe BE-së. Përgjatë tre ditëve do të diskutohet edhe për luftën në Ukrainë, konfliktin në lindjen e mesme e sigurinë kibernetike. Në hyrje të konferencës u transmetuan pamje nga sulmi i Hamasit në Izrael, sulmi ndaj ushtarëve të KFOR-it në Zveçan e pamje të sulmit terrorist të Bansjkës në veri të Kosovës.