Të mbijetuarit e Aushvicit dhe zyrtarë ndërkombëtarë po shënojnë 80 vjetorin e çlirimit të kampit famëkeq të përqendrimit, emri i të cilit është bërë sinonim me përpjekjet naziste për shfarosjen e hebrenjve. Rreth 50 të mbijetuar janë kthyer në kampin nazist të Aushvic Birkenaut, për të vendosur kurora me lule e mbajtur fjalime. Rreth 1.1 milion njerëz, shumica prej tyre hebrenj, u vranë në kompleksin e Aushvicit, duke e bërë atë vendin e ekzekutimit më të madh masiv të qenieve njerëzore të regjistruar ndonjëherë. 27 Janari është dita mbarëbotërore e paralajmërimit dhe e përkujtimit të të gjitha viktimave të Holokaustit. Si e tillë, u shpall nëntorin e vitit 2005 nga Asambleja e Përgjithshme e OKB-së. "Holokausti, në të cilin u vranë një e treta e popullit hebre dhe anëtarë të panumërt të pakicave të tjera, do t`u shërbejë gjithmonë të gjithë njerëzve si paralajmërim nga rreziku i urrejtjes, intolerancës, racizmit dhe paragjykimit”, thuhet në deklaratën e saj. Më 27 janar 2006, kur u shënua dhe hera ë parë që kremtohej kjo ditë, sekretari i atehërshem i OKB-së Kofi Annan e përshkroi Holokaustin si një “tragjedi të pashoqe e Holokaustit që nuk mund të zhbëhet. Kujtimi i tij duhet të mbahet i gjallë me turp dhe tmerr, për aq kohë sa zgjat kujtesa njerëzore", tha ai.