Teksa vëmendjen e botës e ka rrëmbyer një tjetër konflikt i ashpër, ai mes Iranit dhe Izraelit, me potencialin të shkaktojë trazira përtej Lindjes së Mesmë, një tjetër luftë vazhdon të zhvillohet në heshtje. Sulmet rusë me dronë e raketa kanëe vazhduar në Ukrainë, duke vrarë gjatë natës të paktën 9 persona, e duke plagosur dhjetëra të tjerë. 6 vetë humbën jetën në Kiev, ku në ndërtesë banimi u shemb pjesërisht e ku ekipet e shpëtimit janë përpjekur të nxjerrin njerëzit e mbetur nën rrënoja. Në një zonë tjetër të Ukrainës, një sulm me dron rus me rreze të shkurtër veprimi vrau dy njerëz dhe plagosi dhjetë të tjerë në rajonin e Çernihivit, thanë autoritetet. Sipas kreut të administratës rajonale, Viacheslav Chaus, tre fëmijë janë mes të plagosurve. Një i vrarë e tetë të plagosur u shënuan sakaq edhe në qytetin e Bila Tserkva. Rusia i kreu këto sulme pothuajse një javë pas një sulmi të kombinuar që e ndërmori të martën e kaluar, ku vrau 28 njerëz në Kiev, 23 prej të cilëve në një ndërtesë banimi që u shemb pasi u godit drejtpërdrejt nga një raketë ruse. Presidenti i Ukrainës, Volodymyr Zelensky, e quajti atë sulm si një nga bombardimet më të mëdha të luftës, e cila është tani në vitin e katërt.