Spitali më i madhi i Gazës, është kthyer në epiqendër të luftës Izrael-Hamas, ndërsa ministria e shëndetësisë në Gaza ka ndarë pamje të pacientëve që zhvendosen brenda korridoreve të mbushura me tym ndërsa forcat izraelite bastisin kompleksin e madh të spitalit. Ushtria izraelite thotë se do ta vijojë aksionin brenda spitalit, pasi ka gjetur armë dhe pajisje ushtarake të Hamasit brenda tij. Presidenti amerikan Joe Biden po përballet me presion në rritje për të frenuar fushatën ushtarake të Izraelit në Gazë, sidomos operacionin që po vazhdojnë në spitalin Al-Shifa. Biden thotë se krimi i parë i luftës i kryer nga Hamasi ishte vendosja e armëve dhe luftëtarëve të tij brenda, poshtë dhe përreth spitaleve. “Izraeli nuk ndërhyri me një numër të madh trupash, nuk sulmoi, nuk nxitoi në veprimet e veta. Ata kanë hyrë brenda në spital me ushtarët e tyre duke mbajtur armë. Më lejoni të jem i qartë. Ne kemi diskutuar për nevojën që ata të jenë tepër të kujdesshëm”, tha Presidenti Joe Biden për gazetarët. Ndërkohë, Organizata Botërore e Shëndetësisë ka shprehur shqetësimin për përhapjen e sëmundjeve në Gaza, pasi disa javë me bombardime të vazhdueshme izreaelite e kanë detyruar popullsinë që të strehohet nëpër kampe, pa ushqime dhe ujë të pijshëm. Sipas OBSH-së, deri më tani janë regjistruar mbi 70.000 raste të infeksioneve akute në rrugët e frymëmarrjes dhe mbi 44.000 raste të diarresë, shifra shumë më të larta sesa pritej. Pamjet: AFP