Ka një përditësim tragjik nga Kievi, ku ekipet e emergjencës kanë nxjerrë trupa të tjerë nga rrënojat e një ndërtese nëntëkatëshe të shkatërruar nga një raketë ruse. Sipas agjencisë së lajmeve AP, numri i të vdekurve nga sulmi ajror në kryeqytetin ukrainas ka shkuar në 28 persona, ndërsa mbi 130 të tjerë janë plagosur. Ndërtesa e banimit u godit nga një nga raketat që Rusia lëshoi në një nga valët më të rënda të sulmeve kundër Kievit që prej fillimit të luftës. Ministri i Brendshëm Ihor Klimenko nëpërmjet një postimi në Telegram nje dite me pare, njoftoi se dhjetë persona u vranë në Kiev dhe dy në Odesa. Mëgjithatë numri i viktimave u rrit ndjeshëm me kalimin e orëve. Sipas agjencisë së lajmeve ‘Ukrinform’, Rusia lëshoi më shumë se 440 dronë dhe 32 raketa kundër objektivave në Ukrainë gjate orëve te fundit. Operacionet e kërkim-shpëtimit vazhdojnë, ndërsa autoritetet ukrainase paralajmërojnë se numri i viktimave mund të rritet më tej.