Bllokimi i autostradës Tiranë-Durrës në ditën e 15 të protestës, solli reagimin e parë të Policisë së Shtetit. 19 protestues u proceduan penalisht, pasi sipas uniformave blu, organizuan dhe nxitën qytetarët për të bllokuar autostradën, në drejtim të Aeroportit “Nënë Tereza”. Policia njofton se ndaj këtyre shtetasve rëndojnë veprat penale “Pengimi i qarkullimit të mjeteve të transportit”, “Organizimi e pjesëmarrja në grumbullime të paligjshme” dhe “Prishja e rendit dhe qetësisë publike”. Policia bën me dije se ka sekuestruar edhe dy automjete të protestuesve. Rreth mesnatës së të dielës, protestuesit marshuan drejt autostradës Tiranë-Durrës, duke bllokuar qarkullimin në këtë aks rrugor dhe më pas, një pjesë e protestuesve vijuan marshimin në drejtim të aeroportit në Rinas deri në orët e para të mëngjesit. Aty u pritën nga uniformat blu. Forcat e policisë ngritën një kordon për të mos lejuar afrimin e protestuesve në terminal. Teksa bënin thirrje për t’u shpërndarë e i konsideronin veprime të jashtëligjshme. Protestuesit vendosën të tërhiqeshin, pa përplasje fizike me efektivët. Debati është hapur lidhur me format e protestës. Një pjesë e tyre mbështesin grumbullimet në shesh si mënyrën më efektive për të siguruar pjesëmarrje të gjerë qytetare, ashtu siç nisi paqësisht, ndërsa të tjerë argumentojnë se protesta duhet të shoqërohet me veprime më dinamike, përfshirë marshime dhe bllokime të akseve kryesore rrugore.