Reshjet e dendura të shiut që kanë vijuar gjatë gjithë natës kanë krijuar problematika serioze në disa zona të qarkut Gjirokastër, duke sjellë bllokime rrugësh, rrezik për banorët dhe ndërprerje të shërbimeve bazë Aksi rrugor Gjirokastër – Tepelenë, pranë zonës së Shkallës së Zezë, vijon të jetë i kalueshëm vetëm me një korsi, për shkak të rënies së dherave nga shpatet e malit. Lëvizja e mjeteve është e vështirësuar dhe me rrezik, ndërsa puna për pastrimin e materialeve inerte po vazhdon. Problem serioz paraqitet edhe në Dogën e Tre Urave, në hyrje të fshatit Petran, ku rruga është e kalueshme vetëm me një sens, duke shkaktuar radhë dhe vonesa në qarkullimin e mjeteve. Situatë e rëndë raportohet nga fshati Arshgilengo, bashkia Gjirokastër, ku për shkak të reshjeve të shumta uji ka shpërthyer brenda një banese, duke përmbytur shtëpinë dhe shkatërruar të gjitha orenditë shtëpiake. Familja ka mbetur pa kushte minimale jetese dhe kërkon ndihmë emergjente. Ndërkohë, mungesa e energjisë elektrike vazhdon në: administrative Kurvelesh (bashkia Tepelenë) Ballaban (bashkia Këlcyrë) Dhjetëra familje janë pa energji, në kushte të vështira moti dhe temperaturash të ulëta. Po ashtu, në disa zona rrugët rurale janë të bllokuara ose të dëmtuara, duke izoluar pjesërisht banorët dhe duke vështirësuar lëvizjen e mjeteve të shërbimit. Situata mbetet kritike dhe kërkon ndërhyrje të menjëhershme, pasi reshjet vazhdojnë dhe rreziku nga rrëshqitjet e dheut dhe përmbytjet është ende i lartë.