“NATO do vazhdojë të ofrojë siguri për Ballkanin Perëndimor, pasi Perëndimi nuk dëshiron të shohë rikthimin e konflikteve të së kaluarës në këtë rajon”. Deklarata u bë nga Sekretari amerikan i Shtetit, Antony Blinken, në përfundim të takimit të ministrjave të Jashtëm të vendeve të NATO-s, në Bruksel. “Një gjë që nuk na duhet në të ardhmen është kthimi i konflikteve në Ballkan. NATO-ja ka luajtur rol thelbësor për të ndihmuar shtetet e rajonit që të përparojnë në rrugën e tyre drejt anëtarësimit në Bashkimin Evropian dhe për qëndrueshmërinë më të gjerë evropiane”, tha sekretari Blinken mes debateve për shtimin e pranisë ushtarake të NATO-s për shkak të shqetësimeve se situata e pazgjidhur mes Kosovës dhe Serbisë mund të rrisë paqëndrueshmërinë në rajon. Tensionet e muajit shtator që kulmuan me sulmin e Banjskës në Kosovë nxiti shqetësimin e vendeve perëndimore se Rusia mund të përpiqet të nxisë konflikte në Ballkan për të shmangur vëmendjen nga agresioni i saj në Ukrainë, ndaj edhe sekretari Blinken u shpreh se: “Aleanca është përgjigjur me vendosmëri ndaj aktorëve që synojnë të destabilizojnë veriun e Kosovës, siç e kemi parë më herët gjatë këtij viti, duke vendosur trupa shtesë në kuadër të KFOR-it. Po ashtu kemi thelluar bashkëpunimin tonë me forcën e udhëhequr nga Bashkimi Evropian në Bosnje e Hercegovinë. Kjo po ashtu ishte pjesë e rëndësishme e bisedës sonë gjatë këtyre dy ditëve”. Aleanca tha se po shqyrton shtimin afatgjatë të trupave për të ruajtur qëndrueshmërinë në rajon, ndërsa u bëri thirrje palëve që të punojnë në kuadër të bisedimeve të ndërmjetësuara nga Bashkimi Evropian për normalizimin e marrëdhënieve. Pamjet: AFP