Sekretari amerikan i Shtetit Antony Blinken po vijon takimet në Lindjen e Mesme me qëllim arritjen e një armëpushimi në Gaza. Ai u takua këtë të enjte me presidentin egjiptian Abdel Fattah El-Sisi në Kajro ku diskutoi për këtë çështje. Sipas Reuters, Blinken tha për mediat arabe se shba do të vijojnë të ushtrojnë presion me qëllim arritjen e një marrëveshjeje mes Izraelit dhe Hamas për ndaljen e luftimeve si dhe për lirimin e të gjithë pengjeve. Po ashtu kryediplomati amerikan e cilësoi të gabuar operacionin ushtarak në Rafah. Ai sqaroi se ky do të ishte një gabim shumë I madh nga ana e qeverisë izraelite pasi rrezikon të rrisë akoma më shumë krizën humanitare që ka përshirë këtë zonë. Bisedimet për armëpushim po zhvillohen me ndërmjetësimin e Katarit dhe Egjiptit por deri më tani palët nuk kanë rënë dakord me kushtet. Problemi kryesor mbetet grupi terrorist I Hamas që thotë se do t’i lirojë pengjet vetëm si pjesë e një marrëveshjeje që do t'i jepte fund luftës, ndërsa Izraeli kërkon të diskutojë vetëm për një pauzë të përkohshme. Blinken, i cili po e viziton Lindjen e Mesme për herë të gjashtë që nga muajit tetor kur dhe nisi konflikti, krahas presidentit të Egjiptit u takua dhe me diplomatët e lartë arabë në Kajro për të diskutuar për arritjen e një armëpushimi në Gazë dhe për planet për të ardhmen e enklavës palestineze pas luftës. Ditën e premte sekretari amerikan I shtetit do të udhëtojë drejt Izraelit ku do të takohet me kryeministrin izraelit Benjamin Netanyahu. Nga luftimet kanë humbur jetën mbi 32 mijë palestinezë, ndërsa në radhët e Izraelit rreth 1200 civilë ndërsa po mbahen peng më shumë se 100 të tjerë nga ana e Hamas. Pamjet; AFP