Sekretari amerikan i Shtetit Antony Blinken tha të premten pas përfundimit të një vizite në Vienë se Uashingtoni po punonte "intensivisht" me partnerët e tij "për të kapërcyer boshllëqet e mbetura" për një marrëveshje për lirimin e pengjeve të mbajtura nga Hamasi dhe për të siguruar një armëpushim në Gaza. Hamasi ka propozuar një armëpushim të ri gjashtë-javor në Gaza dhe një shkëmbim të disa dhjetëra pengjeve izraelite për të burgosur palestinezë, tha një zyrtar nga grupi militant për AFP të premten. Zyra e kryeministrit Benjamin Netanyahu tha se Izraeli do të dërgojë një delegacion në Doha për një raund tjetër bisedimesh për të siguruar lirimin e pengjeve në Gaza. Sipas Blinken kjo ëvizje reflekton ndenjën e mundësisë dhe të urgjencës për të arritur një marrëveshje, për të marrë një armëpushim, për të rikthyer pengjet, për të marrë edhe më shumë ndihmë humanitare. Kur u pyet për një ofensivë të mundshme ushtarake izraelite në Rafah, Blinken tha se SHBA nuk kishte parë plane të tilla, duke përsëritur se Uashingtoni dëshiron një "plan të qartë dhe të zbatueshëm" për të siguruar që civilët të mos dëmtohen. Izraeli deri më tani ka refuzuar të tërhiqet nga Gaza, duke thënë se një veprim i tillë do të ishte fitore për Hamasin. Zyra e Netanyahut tha të enjten vonë se Hamasi "po vazhdon të mbajë kërkesa joreale", por se një përditësim mbi bisedimet e armëpushimit do t'i dorëzohet kabinetit të luftës të Izraelit të premten. Pamjet: AFP