Ministri i Brendshëm i Pakistanit mbërriti në Teheran të shtunën "për të lehtësuar" bisedimet e paqes midis Iranit dhe Shteteve të Bashkuara, të cilat kanë ngecur pavarësisht një armëpushimi të brishtë, raportuan mediat iraniane. "Mohsin Naqvi po zhvillon në Teheran një vizitë zyrtare dy-ditore, si pjesë e përpjekjeve të vazhdueshme të Pakistanit për të lehtësuar bisedimet dhe për të promovuar paqen rajonale", raportoi agjencia e lajmeve Tasnim. Islamabadi ka ndërmjetësuar në mënyrë aktive në bisedimet e paqes midis Iranit dhe SHBA-së dhe muajin e kaluar priti një takim me rëndësi të lartë midis delegacioneve nga të dyja palët. Një armëpushim që filloi më 8 prill ka ndaluar kryesisht luftimet që shpërthyen kur forcat amerikane dhe izraelite sulmuan Iranin më 28 shkurt. Kryenegociatori i Iranit dhe kryetari i parlamentit, Mohammad Bagher Ghalibaf, ka deklaruar se Uashingtoni duhet ta pranojë propozimin e Teheranit për paqe. "Nuk ka alternativë tjetër përveçse të pranohen të drejtat e popullit iranian siç përcaktohen në propozimin me 14 pika, tha ai. Ndërkohë që ministri i Jashtëm iranian, Abbas Araghchi, tha se Teherani kishte marrë mesazhe nga Uashingtoni që tregonin se administrata e Presidentit Donald Trump ishte e gatshme të vazhdonte negociatat.