Thellohet bilanci i viktimave nga tërmetet katastrofike në Venezuelë. Autoritetet raportojnë se numri i të vdekurve është rritur në më shumë se 1400. Mbi 3 mijë persona kanë mbetur të plagosur, ndërsa mijëra familje kanë humbur banesat e tyre. Kërkimet për rreth 50 mijë të zhdukur vijojnë për të 4-tën ditë radhazi, ndërsa mbi 20 ekipe ndërkombëtare shpëtimi janë angazhuar në terren. Zona më e prekur është ajo e La Guairas shumë pranë kryeqytetit të vendit, Karakasit. Orët sa vijnë dhe janë më kritike për shpëtimin e jetëve nën gërmadha, mes pas-lëkundjeve që vijojnë prej të mërkurës, kur u shënuan dy tërmetet shkatërrimtar me magnitudë 7.2 dhe 7.5. Deri më tani, autoritetet raportojnë për 430 pas-lëkundje, ndërsa i cilësojnë tërmetet si ngjarjen më katastrofike në vend në 123 vitet e fundit. Ndërkohë, një pistë në aeroportin e Karakasit është rihapur për fluturime, duke mundësuar uljen e avionëve amerikanë që po transportojnë ndihma humanitare për të prekurit nga kjo fatkeqësi e madhe natyrore. Autoritetet në Venezuelë kanë njoftuar se spitalet janë të mbingarkuar, ndërsa mjekët kanë ngritur alarmin për mungesë ilaçesh për trajtimin e të lënduarve. "Të gjitha spitalet kanë mungesë furnizimesh, mungesë ilaçesh, nuk jemi në gjendje t'u ofrojmë kujdes mjekësor njerëzve tanë në një ditë normale", u shprehën mjekët në vend. Mes rrënojave, ekipet e shpëtimit vijojnë të nxjerrin ende njerëz të gjallë, siç ishte rasti i një foshnje vetëm 18-muajshe dhe një vajze 15-vjeçare me qenin e saj. Bashkë me ekipet vendase dhe ato nga Shtetet e Bashkuara të Amerikës, po ndihmojnë edhe grupe nga Holanda, Meksika, Zvicra, Britania e Madhe dhe vende të tjera të botës.