Sinjalet se vështirësitë ekonomike në SHBA janë shtuar, morën hov të ri me lajmin se borxhi kombëtar i SHBA-së kaloi shifrën e 40 trilionë dollarëve, duke ngritur shqetësime si brenda vendit. Në fillim të mandatit të parë presidencial të Trump, në vitin 2016, borxhi kombëtar i SHBA-së ishte pak nën 20 trilionë dollarë. Në dekadën që pasoi, ai është dyfishuar, kujton BBC. “Diçka shumë e ndryshme tani, krahasuar me një dekadë më parë, është niveli i normave të interesit”, thotë Eric Sëanson, profesor i ekonomisë në Universitetin e Kalifornisë dhe ish-ekonomist i lartë në Rezervën Federale. “Normat afatgjata të interesit në SHBA janë në nivelet më të larta të dekadave të fundit-një pjesë e kësaj lidhet me shqetësimet për inflacionin, por një pjesë lidhet edhe me shqetësimet për nivelet ekstreme të huamarrjes së qeverisë amerikane,”shton ai. Tregu i obligacioneve po kërkon kthime më të larta, pasi investitorët janë të shqetësuar për përmasat e borxhit amerikan. Në të njëjtën kohë, kompanitë teknologjike që po marrin hua shuma marramendëse për të investuar në inteligjencën artificiale po konkurrojnë me qeverinë për paratë e investitorëve. Sipas parashikimeve, borxhi i SHBA-së mund të mbërrijë në rreth 64 trilionë dollarë deri në vitin 2036. Megjithatë, ekonomistët thonë se situata nuk është ende kritike. Pozita e Shteteve të Bashkuara si ekonomia më e madhe në botë dhe dollari si monedha rezervë globale i japin vendit një “hapësirë shumë më të madhe për të gabuar fiskalisht” sesa vendeve të tjera, thonë ata, duke shtuar se “po arrijmë në një pikë ku drita e verdhë po pulson, por nuk është ende dritë e kuqe”.Borxhi kombëtar amerikan është rreth 126% e madhësisë së ekonomisë, por kjo shifër është më e ulët se në vendet e tjera të G7, si Japonia dhe Italia.