Një defekt teknik në sistemin e kontrollit të trafikut ajror shkaktoi kaos këtë të martë në Mbretërinë e Bashkuar, duke bllokuar nisjet nga disa prej aeroporteve më të mëdha të vendit dhe duke çuar në anulimin e qindra fluturimeve. Sipas ofruesit kombëtar të shërbimeve të kontrollit ajror, National Air Traffic Services (NATS), problemi është zgjidhur dhe sistemi po rikthehet gradualisht në funksion normal. Ndër kompanitë më të prekura është Ryanair, e cila bëri të ditur se mbi 65 mijë pasagjerë janë prekur nga ndërprerja, ndërsa ka anuluar më shumë se 50 fluturime. Kompania u bëri thirrje pasagjerëve që udhëtojnë drejt ose nga Mbretëria e Bashkuar të kontrollojnë aplikacionin e saj për përditësimet më të fundit. Deri më tani, janë anuluar më shumë se 300 fluturime, shifër që pritet të rritet. Mes kompanive më të goditura janë British Airëays me 96 anulime, easyJet me 92, Lufthansa me 12 dhe Sëiss me 11. Sipas Eurocontrol, për shkak të një defekti në pajisjet e kontrollit ajror në Sëanëick, hapësira ajrore e Londrës po operon me kapacitet të reduktuar, duke shkaktuar vonesa të konsiderueshme në trafikun ajror. Autoritetet u kërkuan disa aeroporteve evropiane, përfshirë Brukselin, Frankfurtin, Amsterdamin, Dublinin, Kopenhagenin dhe Parisin, të jenë të gatshme për të pritur avionë që mund të devijohen, nëse situata do të përkeqësohej. Sipas të dhënave të Flightradar24, probleme janë regjistruar në dhjetë aeroporte britanike.