Skandalet e njëpasnjëshme të zbuluara nga mediat britanike, rrëzojnë nga karrigia e pushtetit Nigel Farage, i njohur si ideatori dhe frymëzuesi i Brexit, udhëheqës i partisë “Reforma” dhe një zë i fortë kundër emigrantëve shqiptarë. Këtë të martë, politikani britanik njoftoi dorëheqjen si deputet i zonës së Clacton, duke çuar në zgjedhje të pjesshme këtë zonë zgjedhore, në të cilën ai konfirmon se do të kandidojë sërish. "Kam vendosur që njerëzit e Clacton duhet të jenë gjykatësit e veprimeve të mia. Dhe kjo është arsyeja pse do të paraqes emrin tim për të kandiduar në këto zgjedhje të pjesshme. Do të luftoj për të fituar. Do të luftoj për të vazhduar revolucionin politik që ka filluar Reforma". Dorëheqja e Farage nga parlamenti britanik vjen pak ditë pasi media e njohur “Sunday Times” zbuloi se ai kishte pranuar përfitime financiare nga një britanik i dënuar në Shtetet e Bashkuara të Amerikës për mashtrim në internet. Sipas gazetës, Farage nuk i ka deklaruar këto përfitime në kuadër të hyrjes si deputet i ri në parlamentin britanik. Gjithashtu, pak muaj më parë, mediat britanike zbuluan se, vetëm një ditë para se Farage të kandidonte për deputet, kishte marrë një shumë prej 5 milionë paundësh nga investitori i kriptomonedhave, Christopher Harborne, shumë të cilën nuk e kishte deklaruar, dhe që, në një reagim, deputeti e cilësoi si dhuratë nga biznesmeni britaniko-tajlandez. Ndërsa njoftoi dorëheqjen e tij, Nigel Farage tha se nuk ka bërë asgjë të gabuar dhe as ka shkelur ligjin. “Të fitosh para nuk është krim”, tha Farage, duke e cilësuar “krejtësisht të pasaktë” raportin e “Sunday Times”, të botuar në fundjavë.