Mandati i Holta Zaçajt si kryetare e Gjykatës Kushtetuese do të përfundojë më 10 mars të vitit 2025. Anëtarët e Gjykatës Kushtetuese kanë votuar këtë të hënë pro qëndrimit të Gjykatës së Lartë, e cila ka hapur procedurën për zgjedhjen e anëtarit të ri të Kushtetueses, duke përllogaritur 10 marsin si datë të mbarimit të mandatit të gjyqtares Zaçaj. Vetë Holta Zaçaj ka pretenduar se mandati i saj në krye të Kushtetueses përfundon në fund të vitit 2025. Por, me shumicë votash, Kushtetuesja ka vendosur që mandati i saj përfundon në marsin e 2025-ës. “Gjykata mbajti në konsideratë se Kushtetuta parashikon si datë të fillimit të detyrës betimin para Presidentit të Republikës, (neni 129), kurse neni 8, pika 3, i ligjit organik, ndërsa përmban të njëjtin parashikim për fillimin e mandatit, përcakton se mbarimi i tij është në datën e njëjtë të atij muaji të vitit të nëntë, përveç rasteve kur Kushtetuta parashikon ndryshe”, thuhet në vendimin e Gjykatës Kushtetuese. Pak ditë më parë, kryetarja e Gjykatës Kushtetuese, Holta Zaçaj, tha se do t’i kërkojë interpretim Komisionit të Venecias në lidhje me afatin e përfundimit të mandatit të saj në Gjykatë, pasi sipas saj, mandatet e anëtarëve të Gjykatës nuk mund të kufizohen nga organi i emërtesës.