Presidenti i Shteteve të Bashkuara të Amerikës, Joe Biden, ka pritur në Shtëpinë e Bardhë presidentin ukrainas, Volodymyr Zelensky. Ai e ka marrë këtë vendim pas kritikave të ashpra të Trump, që e cilësoi Zelenskyn një biznesmen të mirë që merr vetëm para nga SHBA. Ndërkaq, Zelensky, ka njoftuar për ndihmën e re ushtarake të SHBA-së në vlerë prej gati 8 miliardë dollarësh. Në një postim në rrjetet sociale, Zelensky ka deklaruar se ndihma e shpallur të enjten do të ndihmojë vendin e tij të arrijë fitoren kundër Rusisë. “Ne do ta përdorim këtë ndihmë në mënyrën më efektive dhe transparente të mundshme për të arritur qëllimin tonë kryesor të përbashkët: një Ukrainë fitimtare, një paqe të drejtë dhe të qëndrueshme dhe siguri transatlantike”, ka shkruar Zelensky. Bideni nga ana tjetër është shprehur se e përgëzon Zelenskyn, duke shtuar se për gati tri vjet, SHBA-ja e ka mbledhur botën “për të qëndruar me popullin ukrainas, derisa mbrojnë lirinë e tyre nga agresioni rus”. Administrata Biden ka bërë me dije se do t’i zgjerojë stërvitjet ushtarake për pilotët ukrainas të avionëve F-16. Kjo qeverisje ka thënë se do t’i sigurojë Ukrainës municion me rreze të gjatë veprimi.