Sekretarja e Shtypit në Shtëpinë e Bardhë, Karina Zhan-Pierr ka thënë se presidenti Biden nuk do të heqë dorë nga gara për t’u rizgjedhur. "Absolutisht jo”, ka thënë Zhan-Pierr kur u pyet nëse Joe Biden do të largohej, raporton BBC. Ajo tha se ishte një pyetje e drejtë për t'u bërë, por vuri në dukje punën e Bidenit si një shembull të aftësisë së tij për të vazhduar të udhëheqë. “Bideni është më i mprehtë se kurrë”, shtoi ajo. Shtëpia e Bardhë i mohon raportimet se Biden po e shqyrton kandidaturën e tij për president dhe hodhi poshtë si "absolutisht të rremë" një raport të New York Times të mërkurën, që thoshte se presidenti i SHBA, i kishte thënë një aleati se po meditonte të mos vazhdonte garën për t’u rizgjedhur në nëntor. Performanca e lëkundur e Bidenit në debatin kundër rivalit republikan, Donald Trump javën e kaluar nxiti thirrje që ai të tërhiqet si kandidat demokrat për zgjedhjet e 5 nëntorit. Pamjet: AFP