Një person ndodhet në gjendje kritike pas një incidenti me të shtëna me armë zjarri në Arivaka të Arizonës, ku u përfshi sërish një agjent federal i ICE, njoftuan autoritetet lokale. Arivaka është një komunitet me rreth 600 banorë, një orë në jug të Tucsonit (Tysonit), pranë kufirit SHBA–Meksikë. Ngjarja ndodhi ndërsa tensionet mbi operacionet federale të imigracionit në SHBA janë rritur. Në Minneapolis, disa përplasje midis agjentëve federalë dhe qytetarëve kanë nxitur protesta dhe reagime të forta politike. Ish-Presidenti Joe Biden kritikoi ashpër administratën aktuale në platformën “X”, duke thënë se SHBA nuk janë vend ku “qeveria synon dhe godet qytetarët e saj në rrugë”. Ai kërkoi respektimin e të drejtave kushtetuese dhe u bëri thirrje komuniteteve amerikane për të qëndruar të vendosura e për të folur kundër padrejtësive. Biden fajësoi qeverinë dhe tha se “askush nuk ka të drejtë të shkatërrojë atë që amerikanët e kanë ndërtuar prej dekadash”.