Me mesazhin “ka ardhur koha që kjo luftë të marrë fund”, presidenti amerikan Joe Biden paraqiti planin e tij drejtuar Izraelin për mbylljen e konfliktit në Rripin e Gazës. Plani përbëhet nga tre faza, e para e të cilave përfshin një armëpushim gjashtëjavor, gjatë të cilit forcat izraelite duhet të tërhiqen nga “të gjitha zonat e banuara “ të territorit; disa pengje – të moshuar dhe gra – do të duhet të lirohen në këmbim të lirimit të qindra të burgosurve palestinezë; civilët palestinezë do të ktheheshin në shtëpitë e tyre në Gazë; dhe 600 kamionë në ditë do të dërgonin ndihmë humanitare në enklavën e rrënuar. Në këtë fazë, Hamasi – grupi i shpallur terrorist nga SHBA dhe BE – dhe Izraeli do të bisedonin për një armëpushim të përhershëm, për të cilin Biden tha se do të zgjaste “për aq kohë sa Hamasi do të respektojë zotimet e marra”. Nëse bisedimet zgjasin më shumë se gjashtë javë, armëpushimi i përkohshëm zgjatet gjithashtu për aq kohë sa vazhdojnë bisedimet. Në fazën e dytë, Biden tha se do të shkëmbeheshin të gjitha pengjet e gjalla, përfshirë ushtarë; forcat izraelite do të tërhiqeshin nga Gaza dhe do të hynte në fuqi pushimzjarri i përhershëm. Faza e tretë parashikon një plan të madh rindërtimi për Gazën, si dhe rikthimin e “mbetjeve të fundit” të pengjeve te familjet e tyre.