Edhe deri vonë është shfaqur ngurrues, presidenti i Shteteve të Bashkuara Joe Biden duket ka ndryshuar mendim e tani shprehet i gatshëm të marrë pjesë në një debat me Donald Trump-in, kundërshtarin e tij republikan për zgjedhjet e nëntorit. “Jam i gatshëm. Nuk e di kur”, tha presidenti demokrat në një intervistë me prezantuesin Hoëard Stern. “Do të debatoja me kënaqësi me të”. Këto ishin deklaratat më të qarta të Biden mbi mundësinë e një debati presidencial. Ain nuk kishte shfaqur gatishmëri për të debatuar me Trump, duke thënë muajin e kaluar se një gjë e tillë do të varej nga sjellja e ish-presidentit. Republikani megjithatë javët e fundit e kishte sfiduar hapur Bidenin që t’i dalë përballë në debat, duke u shprehur i gatshëm të debatojë me Presidentin demokrat aktual "kurdo dhe kudo”. Në fillim të këtij muaji, dy këshilltarët kryesorë të ekipit të fushatës së Trump i dërguan një letër një komisioni të pavarur që normalisht përcakton ngjarje të tilla, duke kërkuar përshpejtimin e kalendarit të debateve dhe realizimin e më shumë se 3 të tillëve që zhvillohen zakonisht. Dhjetëra organizata mediatike i kanë bërë thirrje kandidatëve që të zotohen publikisht për një debat përballë njëri-tjetrit. Biden kryeson për sa i përket mbështetjes nga votuesit e regjistruar, në nivelin 41 për qind përballë 37 për qind që ka Trump, sipas një ankete të bërë nga kompania e anketimeve Ipsos dhe agjencia e lajmeve Reuters, më herët gjatë këtij muaji.