Presidenti amerikan, Joe Biden, ka thënë se ai dhe administrata e tij do të mundësojnë kalim paqësor të pushtetit te Donald Trumpi që fitoi zgjedhjet presidenciale të 5 nëntorit. Ndryshe nga republikani, i cili katër vite më parë bojkotoi betimin e Bidenit si president, ky i fundit deklaroi në konferencën për shtyp se shteti dhe funksionarët e tij duhet të pranojnë zgjedhjen e popullit. “Nuk mund ta duash shtetin vetëm kur fiton. Nuk mund ta duash fqinjin tënd vetëm kur je dakord. Ne jemi në një demokraci. Vullneti i popullit gjithmonë mbizotëron. Dje fola me Presidentin e zgjedhur Donald Trump për ta uruar për fitoren e tij dhe e sigurova se do ta orientoja të gjithë administratën time që të punojë me ekipin e tij për të siguruar një tranzicion paqësor dhe të rregullt. Kjo është ajo që meriton populli amerikan” Biden e ka cilësuar presidencën e tij historike dhe u ka bërë thirrje mbështetësve demokratë të kenë besim në të ardhmen. “Ne po largohemi duke lënë pas ekonominë më të fortë në botë. Tani kemi 74 ditë për të mbaruar mandatin tonë dhe le t’i bëjmë gjërat siç duhet çdo ditë. Ne e humbëm këtë betejë, por ju bën thirrje që të ngriheni përsëri” Joe Biden u tërhoq në korrik nga gara për të rikandiduar si president, pasi humbi debatin me Donald Trumop. Zëvendësja e tij, Kamala Harris i humbi zgjedhjet duke marrë 223 vota, kundrejt 294 që fitoi Trump. Republikanët morën edhe kontrollin e dhomës së përfaqësuesve.