Vrasja e komandantit të grupit militant Hezbollah, Hasan Naserllah u mor përsipër nga ushtria izraelite. Përmes një deklarate të IDF-së, u komunikua se ai nuk do jetë më në gjendje të terrorizojë botën”. Kryeministri Benjamin Netanjahu tha se “lau hesapet” që kishte me kreun e Hezbollahut, para se vetë grupi militant ta konfirmonte vdekjen e udhëheqësit të tij. Vetë presidenti amerikan Jo Biden reagoi për sulmin duke e cilësuar atë një "masë drejtësie" ndaj sundimit të terrorit prej katër dekadash. Shtetet e Bashkuara të Amerikës e kanë shpallur organizatë terroriste Hezbollahun, ndërkohë që gjatë deklaratës së tij, Biden tha se gabimi i liderit të Hezbollahut ishte rreshtimi krah Hamasit. Biden e bëri përgjegjës Hasan Naserallhun edhe për vdekjen e mijëra amerikanëve. Vrasjen e liderit të Hezbollahut, e dënoi Irani dhe Hamasi, duke e cilësuar akt terrori të disa frikacakëve. Ndërkohe militantët e grupimit Huthi në Jemen janë zotuar të marrin hak. Gjatë mbrëmjes së të shtunës Izraeli vijoi sulmet me raketa në Liban. Ky është momenti kur një raketë shënjëstroi një magazinë pranë aeroportit të Bejrutit, i vetmi aeroport ndërkombëtar për pasagjerët në Liban. Pamjet e AFP-së tregojnë tymin që del pranë pistës së avionëve, ndërsa Izraeli tha se goditi një tjetër bazë të Hezbollah.