Administrata Trump fitoi një shtyrje të përkohshme për të mbajtur kontrollin mbi trupat e Gardës Kombëtare të Kalifornisë, të paktën deri të martën, pas një dite përplasjesh ligjore mbi vendimin e presidentit për t’i dërguar ata për të shtypur demonstratat në Los Angeles që shpërthyen pas bastisjeve për emigracionin. Gjykatësi federal urdhëroi fillimisht Donald Trump-in të enjten të rikthente kontrollin e forcës rezervë te guvernatori i Kalifornisë, Gavin Newsom, më 17 qershor, duke deklaruar se veprimet e presidentit ishin "të paligjshme". Një gjykatë apeli më pas dha vendimin e saj brenda minutash, duke pezulluar urdhrin e Breyer-it deri në një seancë të caktuar për të martën. Kjo do të thotë se Trump do të mbajë kontrollin e Gardës Kombëtare në Kaliforni gjatë protestave të planifikuara për sot. Dhuna, megjithëse e përhapur në mënyrë sporadike, ka tronditur Los Angeles-in gjatë ditëve të protestave kundër bastisjeve për emigrantët të nisura nga administrata Trump. Por përplasjet ishin "larg nga ajo që mund të quhet rebelim", tha Breyer në një vendim prej 36 faqesh të publikuar të enjten, duke kundërshtuar përshkrimin që presidenti bëri për të justifikuar dërgimin e Gardës Kombëtare. Veprimet e Trump "ishin të paligjshme... Prandaj ai duhet të rikthejë kontrollin" e trupave te guvernatori Newsom, tha Breyer. Newsom e përshëndeti menjëherë vendimin e gjykatësit — një fitore shumë e nevojshme në një nga disa frontet ku Kalifornia demokrate po përballet me Shtëpinë e Bardhë. Trump "nuk është monark, nuk është mbret dhe duhet të ndalë së sjelluri si i tillë", tha 57-vjeçari demokrat.