Komisioni i Zgjedhjeve pritet t’i shpallë mbrëmjen e së hënës rezultatet zyrtare të zgjedhjeve parlamentare në Serbi, por nënkryetarja e Partisë Përparimtare Serbe, Ana Bërnabiç, kryeministre në detyrë, tha se në bazë të rezultateve paraprake kjo parti ka fituar 47,1 për qind të votave, ndërsa lista e partive opozitare “Serbia kundër dhunës” ka fituar 23 për qind. Sipas saj, nëse numërimi i votave vijon me këtë ritëm koalicion i drejtuar nga partia e saj do të ketë shumicën absolute me mbi 125 deputetë në parlamentin 250 vendesh të Serbisë. Pjesëmarrja në zgjedhjet e parakohshme parlamentare që u zhvilluan këtë të dielë në Serbi ishte 55.9 për qind e qytetarëve me të drejtë vote, më e lartë se ajo e zgjedhjeve të prillit 2022. Vëzhgues të partive opozitare raportuan për parregullsi të mëdha si gjatë fushatës së tensionuar ashtu edhe përgjatë ditës së votimit. Mediat e pavarura thanë se serbë nga Bosnja fqinje u mblodhën për të votuar në një sallë sportesh në Beograd që nuk ishte një qendër votimi zyrtar. Po ashtu mediat në Kosovë raportun se edhe serbë nga Mitrovica kishin shkuar në Serbi me qëllim që të siguronin vota për Vucic.