Përpara vizitës së zyrtarit të lartë amerikan, Derek Chollet, kryeministrja serbe Ana Bërnabic pohoi se premtimi i SHBA-së që formimi i Asociacionit e komunave me shumicë serbe të nisë në janar, pritet të jetë "në tryezën" e bisedimeve. “Kjo do të ishte një gjë shumë mirë sepse do të përbënte zbatim të Marrëveshjes së Brukselit”, tha ajo për televizion serb, Pink. Por edhe pas këtij pohimi megjithatë, shefja e ekzekutivit serb u përpoq t`i ulte pritshmëritë e publikut, duke rrëfyer se nuk pret shumë nga nga vizita e Cholletit në Beograd. Marrëveshja për themelimin e Asociacionit u arrit në 2013-tënnë kuadër të dialogut Kosovë - Serbi në Bruksel dhe dy vjet më vonë, mbërriti ujdia mbi parimet për themelimin e tij. Por po atë vit, Gjykata Kushtetuese e Kosovës doli në përfundimin se disa pika të kësaj marrëveshjeje nuk janë në harmoni me kushtetutën dhe u kërkua rishikimi i tyre. Si mënyrë për të zbutur palën serbe e për të arritur më në fund një marrëveshje gjithëpërshirëse mes palëve, SHBA-ja dhe BE-ja ia kanë dhënë edhe ato bekimin formimit të Asociacionit, por kryeministri i Kosovës, Albin Kurti, është shprehur kundër një Asociacioni njëetnik. Chollet ndalon nesër në Serbi, e sipas një njoftimi të DASH-it, edhe me krerët e Kosovës, edhe me ata serb, në plan të parë të bisedimeve është integrimi euroatlantik, dhe arritja e një marrëveshjeje për normalizimin e raporteve mes dy shteteve, të bazuar në njohje reciproke.