“Foltorja e ripërtëritjes” e Sali Berishës u ndal të premten në Elbasan. Me qëllimin e ripërtëritjes së Partisë Demokratike, Berisha iu drejtua me një thirrje të gjithë demokratëve. “Ripërtëritja e Partisë Demokratike është jetike dhe përcaktuese për ripërtëritjen e Shqipërisë. Ndaj dhe kjo ripërtëritja jonë është jetike për ripërtëritjen e Shqipërisë. Ne kemi një vizion me të cilin do t’i japim përgjigjen më të merituar, më të sigurt, kësaj gjëme që ka pllakosur kombin tonë, kësaj varfërie, këtij mjerimi që ecën me shpejtësi”. Në bashkëbisedimin me demokratët dhe qytetarët, në kuadër të procesit të ripërtëritjes së strukturave të Partisë Demokratike, Berisha nuk i kurseu sulmet ndaj kundërshtarit politik, ndërsa prezantoi disa premtimeve që Partia Demokratike synon të vendosë në qendër të programit të saj. “Ne do vendosim dyfishimin e rrogave dhe të pensioneve si kushti i parë i mandatit të parë. Do heqim taksën për të gjitha ushqimet. Opozita do të ndjekë politikën e “zero tolerancës” ndaj organizatave kriminale”. Në foltoren e Elbasanit, Berisha e përqendroi fjalën e tij te gjendja ekonomike dhe sociale në vend, emigracioni, pensionet, çmimet dhe lufta kundër krimit të organizuar.