Edi Rama është i bindur në objektivin: Shqipëria në BE brenda 2030-ës, por për Sali Berishën ai i mbylli dyert e Europës me vendimin për të mos i hapur rrugën arrestimit të Belinda Ballukut. Berisha e lexon rrëzimin e kërkesës së SPAK-ut nga socialistët si mbylljen e dyerve të hetimit. “Reagimi i tij, reagim tipik i hajdutit që për të shpëtuar lëkurën është i aftë të marrë çdo vendim dhe veprim, ishte mbyllja e dyerve hetimit dhe sistemit të drejtësisë. Këto zhvillime kërkojnë që PD dhe opozita të përgatiten në mënyrën më serioze për problematikat e mëdha të krijuara nga një regjim 12-vjeçar. Ne pavarësisht se ky i mbylli sot dyert e Europës, por ne rrugë tjetër përveçse drejt Europës, nuk kemi”. Edhe pse me numra të paktë në sheshe, Berisha ka bindjen se do ta rrëzojë Ramën nga pushteti dhe punën si kryeministër i ardhshëm do ta nisë me rrugët. Për këtë, ai mblodhi të premten ekspertët e Departamentit të Infrastrukturës pranë selisë blu, të cilëve iu kërkoi hartimin e planit konkret. “Ky departament është në misionin e tij për të hartuar planin më të mirë për ndërtimin e urbanistikës më moderne, për të përcaktuar përparësitë e mëdha me të cilat do fillojë që muajt e parë. Ne do përcaktojmë përparësitë tonë, ndërhyrjet me urgjencë, duhet të përgatisim me hollësi programin për përgjigjet më të mira dhe më të shpejta që qeverisja e PD do t’u japë këtyre çështjeve madhore të krijuara”. Ndërsa solli raste të rrugëve, ku sipas tij, është abuzuar gjatë qeverisjes së Ramës, Berisha paralajmëroi llogaridhënie dhe përgjegjësi të plotë për atë, që vetë ai e cilësoi si “katastrofë infrastrukturore në Shqipëri”.