Nga Kukësi, kreu i opozitës, Sali Berisha, iu kërkoi të gjithë emigrantëve shqiptarë që të mos votojnë për Edi Ramën. Duke e quajtur ‘armik të kombit’, Berisha u shpreh se para dy javësh Rama përzuri delegacionin e Kosovës nga Tirana. “Jam këtu në emër të tuaj për t’u përcjellë një mesazh vëllazëror të gjithë emigrantëve, asnjë votë për këtë armik të kombit. Edi Rama përzuri nga Tirana dy javë më parë përfaqësuesin e qeverisë së Kosovës, sepse i vuri nofkën e armikut, në një kohë kur SHBA e etiketoi atë rezolutë si një letër e vdekur e pa kuptim”. Ndërsa Rama e ka fokusuar fushatën e tij te gratë, për Berishën rëndësi ka familja shqiptare, me në fokus, sipas tij, nënat. “Ky program është programi që bazohet tek familja shqiptare. Ne do bëjmë gjithçka që këtë familje ta forcojmë, ta mbështesim. Do bëjmë gjithçka që nëna shqiptare të ketë mbështetjen më të fuqishme. Do subvencionojmë çdo fëmijë, të parin me 70 euro, të dytin me 60 euro, të tretin nga lindja gjer 23 vjeç 100% nga shteti”. Berisha e mbylli takimin elektoral të kësaj të hëne me tre premtime për kuksianët. “U jap fjalën e nderit se hyrja juaj do jetë madhështore. Se trau do hiqet javën e parë. Dhe se Kukësi, do përsëris prapë premtimin tim, do ketë një nga pallatet e sportit më të bukura në Shqipëri. Do falen të gjitha gjobat, kamatat dhe çdo gjë tjetër.”.