Kreu i Partisë Demokratike, Sali Berisha tha se PD do të nisë betejën elektorale me 300 politikanë të rinj për zgjedhjet e 11 majit të vitit të ardhshëm. Ai theksoi se ata kanë çdo dhunti për të qenë lidership i fitores së zgjedhjeve. Berisha: Të dashur miq, rikthehem prapë tek krahasimi i të rinjve në vitin 1990 me ju sot. Dallimi është i dy kohëve në informacion, i kohës pre-internet dhe pas-internet. E mora këtë dallim sepse në kohën e internetit, informacioni që krijohet në një javë tejkalon informacionin e të gjitha kohërave. Ky është dallimi që ju keni me studentët e asaj kohe. Por beteja juaj është një betejë e vështirë. E vështirë sepse sot unë po lexoja një publicist të shquar dhe një prej humoristëve më të mirë, Agim Xhafkën, ‘Ndjesë e vonuar’. Lexojeni atë ese të tij, në të cilën ai tregon se si gazetar në një gazetë kryesore të vendit, ngarkohej të bënte kronika dhe natyrisht në ligjin e kohës, po cili ishte ligji i kohës? Ligji i kohës ishte ligji i dublicitetit.