Kreu i Partisë Demokratike Sali Berisha, tha se me ardhjen e kësaj force politike në pushtet, primare do të jetë vendosja e minimumit jetik, rritja e rrogave dhe pensioneve. Nga mbledhja e Këshillit Kombëtar të PD, Berisha tha se ata që paguhen me pak, do ta kenë më të ulët çmimin e dritave dhe ujit. “Vendosja e minimumit jetik 200 euro. Rroga minimale 500, rroga mesatare 1200 euro. Jo vetëm kaq, nuk mundet shteti t’i shesë energjinë tjetrit si atij me 500 euro dhe atij me 7 mijë euro rrogën. Kurrë, kjo nuk do të ndodhë. Çmimet e energjisë, ujit të pijshëm dhe disa shërbime do të proporcionohen rreptësisht sipas rrogave dhe të ardhurave. E gjithë beteja jonë vitin e parë të qeverisjes do të jetë të shtrojë bazën e një starti të fuqishëm për të dalë në krye të vendeve të rajonit për rrogat dhe pensionet. Ne ishim më mirë se 6 vendet e Ballkanit Perëndimor”-u shpreh ndër të tjera Berisha. Berisha foli edhe për konfiskim vilash dhe hotelesh. “Shqipëria nuk meriton kurrë një diktaturë. Ata që vendosin diktaturën në një popull të stërvuajtur, ky do të përgjigjet. Po, po. Le të shkojë dhe prapa diellit. Pasuritë e tyre do konfiskohen, absolutisht. Shikoni hotelin në Durrës 20 katësh me pronar një njeri që merr rrogën në bashki. 20 kate hoteli në kristale, në xham i tëri. Secili prej tyre është me 3 vila, 5 vila. Nga i gjeti ky ministri i Brendshëm 3 vila njëra pas tjetrës? Këta ku t’i kapësh, i kap në krim. Konfiskim, konfiskim dhe vetëm konfiskim. Dhe ta dinë qytetarët se të gjitha do të shndërrohen në vlera për ta. Do t’u kthehen qytetarëve. Po! Më datën 23 dhjetor, ditën e hënë në ora 17.00, kemi mosbindjen civile më të fuqishmen që ka parë Tirana ndonjëherë. Mbarë bota mezi pret këtë akt, këtë mosbindje, E kanë pëlqyer shumë, kudo në botë. U them unë juve. Se një gjë duhet ta dini. Atë ndihmë që na ka dhënë ne shtypi ndërkombëtar, nuk i dalim borxhit kurrë”.