Në mesazhin e tij nga Asambleja e Partive Popullore Evropiane, në Strasburg, kreu i opozitës, Sali Berisha, denoncoi sërish rivalin e tij politik, kryeministrin Edi Rama, për lidhje me trafikantët. “Meqë diskutohet për monitorimin dhe zgjedhjet në Shqipëri, jam i detyruar t’ju paralajmëroj se Edi Rama, i cili rëndom tashmë quhet Ramaduro apo Noriega i Europës, paraqet aktualisht me qeverinë e tij një rrezik real serioz, jo vetëm për shqiptarët, por edhe për kombet tuaja. Kjo sepse, klanet shqiptare të drogës të lidhura direkt me të janë sot, sipas UN-it, eksportuesit më kryesor të kanabisit dhe aksionerët më kryesorë në tregun e kokainës dhe heroinës në Europë. Sali Berisha akuzoi Ramën se pas zgjedhjeve parlamentare të 11 majit ka firmosur qindra leje ndërtimi për kulla në kryeqytet. “Shqipëria sot, është parajsa e parave të trafiqeve të tyre kriminale. Vetëm pas farsës elektorale të 11 majit, Edi Rama ka firmosur për këto klane 450 leje ndërtimi, për qindra kulla ndërtesa dhe resorte turistike si shpërblim për ndërhyrjen e tyre të fortë në zgjedhje”.