Kryetari i Partisë Demokratike, Sali Berisha, i cili mori pjesë në samitin e Partisë Popullore Europiane në Podgoricë, deklaroi se fokus i diskutimeve ishte situata e Ballkanit Perëndimor dhe sfidat që vijnë nga proceset e integrimit të këtyre shteteve në Bashkimin Europian. Kreu i opozitës akuzoi qeverinë dhe e cilësoi atë pengesën kryesore për integrimin e vendit në BE. “Fokusi i takimit ishte Ballkani Perëndimor në Raport me proceset e Integrimit sfidat dhe pengesat. Pata rast të paraqes pikëpamjet e Partisë Demokratike mbi proceset e integrimit të Shqipërisë dhe rajonit. Natyrisht nga këndvështrimi i opozitës, ngadalësimi i këtij procesi ka shkaqe të brendshme sipas vendeve. Narkoshteti në Shqipëri është pengesa kryesore e integrimit të Shqipërisë në BE” Kryetari i Partisë Demokratike shtoi se nga ana e opozitës do të të vazhdojnë përpjekjet për të denoncuar fenomenet që pengojnë Shqipërinë në rrugën europiane.