Ministri i Brendshëm, Besfort Lamallari, përgëzoi policinë për reagimin ndaj protestuesve të opozitës. Ministri Lamallari theksoi se policia pati një reagim profesional, tregoi vetëpërmbajtje dhe neutralizoi në kohë molotovët, që sipas tij, u përdorën si mish për top për të djegur qytetin dhe për të rrezikuar jetën e efektivëve me uniformë. “Shqipëria nuk do të merret peng nga një pakicë që nuk ngurron të përdorë të miturit për të djegur dhe për të fshehur dështimin e vet. Mes atyre që ndërtojnë të ardhmen europiane të vendit dhe atyre që kërkojnë ta djegin atë, zgjedhja është tashmë e qartë nga mbarë shqiptarët”, u shpreh ministri Lamallari. Nga ana tjetër, kreu i opozitës, Sali Berisha, iu drejtua spitalit, sapo njoftoi mbylljen e protestës nga selia blu. Ai vizitoi të lënduarit, që sipas tij, u sulmuan nga policia me bomba.