Kreu i Partisë Demokratike, Sali Berisha, ripërsëriti thirrjen për demokratët, mbështetësit dhe të gjithë qytetarët, që t’i bashkohen protestës në Tiranë. Ndonëse në protestën në kryeqytet nuk kanë munguar edhe thirrjet kundër Berishës dhe prej 38 ditësh kërkohet rrëzimi i gjithë klasës politike, për liderin e opozitës, ky tubim duhet ta arrijë qëllimin. “Një protestë e madhe qytetare rinore është në vazhdim. Duhet të bëjmë gjithçka që të finalizohet me sukses misioni i saj. Kontributi i gjithsecilit është i jashtëzakonshëm. Ky është nderimi më i madh që u bëjmë ne martirëve të lirisë, të rënëve të kombit, shërbimi më i madh që i bëjmë të ardhmes së fëmijëve tanë dhe të kombit shqiptar dhe Shqipërisë”. Gjatë një takimi në selinë blu, të organizuar nga departamenti i të përndjekurve në PD, ku u përkujtuan inxhinierë dhe drejtues të sektorit të naftës të pushkatuar nga regjimi i Enver Hoxhës, Berisha nuk i kurseu dhe sulmet ndaj kryeministrit Edi Rama. “Sot në Shqipëri nderohen, për fatin më të keq, xhelatët. Nderohen banditët dhe kriminelët. Kohë identike në rrafshin moral me atë të diktaturës së Enver Hoxhës. Të vendosësh në qytetin e Durrësit një rrugë me emrin Kristaq Rama, është një fyerje, është një poshtërim, është një dhunë morale për të gjithë shtresën e të përndjekurve politikë të Shqipërisë”. Gjatë fjalës së tij, Berisha akuzoi mazhorancën socialiste se po rikthen të njëjtin model moral të së kaluarës.