Ndryshe nga kryeministri Edi Rama, i cili mendon se opozita po dëmton procesin e integrimit të vendit në Bashkimin Europian, për Sali Berishën po ndodh e kundërta. Në takimin me krerët e degëve në kryeqytet, Berisha e drejtoi gishtin nga kundërshtari i tij politik. “Ne, në asnjë vend dhe askërkund nuk themi, asnjë fjalë, asnjë presje nga ato që themi këtu. Por ato që themi këtu, s'i themi për interesat tona politike ne. Ne i themi për interesat jetike të qytetarëve shqiptarë dhe ato interesa do mbrohen në çdo arenë, në çdo vend ku diskutohet për to. Ndaj dhe njeriu që i nxin faqen Shqipërisë, njeriu që damkos Shqipërinë, është Edi Rama” I vetëdijshëm për lodhjen nga protestat, kryedemokrati nuk tërhiqet. Ato duhet të vazhdojnë, thotë ai, deri në rrëzimin e qeverisë. “Është një kohë në të cilën ne duhet të qëndrojmë më fuqishëm se kurrë. E lodhshme, rraskapitëse është, jam shumë i vetëdijshëm. Por ne duhet të qëndrojmë dhe do qëndrojmë të pamposhtur. Nuk është faj i demokratëve pse kanë guxim, pse ata janë më guximtarët, se ata janë më të përgjegjshëm për fatin e Shqipërisë dhe fatin e kombit” Me thirrjen që protesta e 8 majit të jetë një kryengritje paqësore, Berisha thekson se aksioni opozitar është dëgjuar nga miqtë e vendit, por sipas tij, edhe nga ata që s’ia duan të mirën Shqipërisë.