Kreu i Partisë Demokratike, Sali Berisha, i është përgjigjur akuzave të Edi Ramës, duke u shprehur se përfaqësuesit e 27 vendeve të BE-së kanë parë realitetin në Shqipëri. Berisha, duke u ndalur tek deklaratat e mëngjesit të kryesocialistit, u shpreh se Rama trajtoi problemin e IBAR-it me akuza ndaj opozitës. “Sot në monologun e mashtrimeve të dielës, Edi Rama pasi shkurtimisht u ndal në udhëtimin e tij pa fryt që i kushtoi taksapaguesve shqiptarë qindra mijëra euro me aeroplan të posaçëm, trajtoi gjerësisht problemin e IBAR-it me një breshëri akuzash kundër opozitës. Së pari, dua të siguroj qytetarët shqiptarë se në atë raport të miratuar me datën 21 maj, opozita nuk ka shkruajtur asnjë fjalë. Por nga ana tjetër, dua të theksoj se ai raport është pothuaj pikë për pikë, ka trajtuar dhe ka vendosur si kushte për Shqipërinë të gjitha problemet madhore që opozita ka ngritur dhe vazhdon të ngrejë para jush.