Pas dy ditësh mungesë, për shkak të takimeve në Kongresin e Partive Popullore Europiane, kreu i opozitës, Sali Berisha, iu rikthye fushatës elektorale. Me entuziazmin e mbështetjes së marrë nga Spanja, Berisha e ndali hapin e parë me të mbërritur në Tiranë, në zonën e Astirit, ku iu premtoi banorëve se do adresojë të gjitha problemet e tyre, nëse fiton zgjedhjet. “Unë jam sot para jush për t’u garantuar ju, banorëve të Astirit, se në projektin e qeverisë së ardhshme, adresimi me urgjencë i të gjitha problemeve të krijuara nga urrejtja që qeveria e Edi Ramës ka shfryrë ndaj kësaj zone, nga injorimi dhe bojkoti që i ka bërë, do të jetë përparësi e madhe. Ju që mbrojtët vlerat qytetare, mbrojtët banesat tuaja, ju do të keni infrastrukturën më moderne arsimore, shëndetësore, rrugore dhe të gjithanshme. Berisha bëri një premtim edhe për të gjithë qytetarët, që kanë probleme shëndetësore. “Garantoj çdo të sëmurë në këtë vend se nuk do t’u mungojnë kurrë ilaçet për shëndetin tuaj. Edhe sikur të mos kishim, përsëri them atë që thashë për rrugët, stolitë e grave do i shisnim që ju të mjekoheni”. Ndërsa për bizneset, kreu i opozitës nuk kishte vetëm një premtim. “Bizneseve të Astirit dhe mbarë Shqipërisë u premtoj vendosjen e taksës së sheshtë 10% nga 23 që është. Uljen e TVSh-së në 15%. Uljen e çmimit të energjisë elektrike në 6 lekë. Përgjysmimin e tarifës së ujit. Biznesi pra do ketë klimën më miqësore, do mund të shtojë investimet dhe punësimin”.