E enjtja parlamentare pritet të prodhojë vijimin e protestës me flakadanë në sallën plenare dhe atë jashtë kuvendit ku do të protestojnë mbështetësit e Sali Berishës, datën kur do të miratohet autorizimi i SPAK. Seanca plenare këtë të enjte ka si pikë të parë të rendit të ditës shqyrtimin dhe votimin e raportit të Këshillit të Mandateve, këshill i cili i dha dritën jeshile autorizimit të kërkuar nga SPAK, për arrestin me burg apo arrest shtëpie për deputetin Sali Berisha. Deputetët e opozitës pritet të mbërrijnë në parlament rreth orës 9. Së bashku me ta do jenë edhe tre deputetët më të fundit të përjashtuar me 10 ditë Edmond Spaho, Kastriot Piroli dhe Saimir Koreshi. Burime nga grupi parlamentar i PD pohojnë se do të përsëriten të njëjtat veprime si seancën e shkuar. Të tentuarit në çarjen e kordonit të gardës për të mundësuar futjen në parlament edhe të tre kolegëve të tyre të përjashtuar, gjë e cila do të bllokojë hyrjen në sallën plenare të deputetëve socialist.