Sali Berisha po i ndjek nga Zagrebi i Kroacisë zhvillimet në selinë blu, ku emri i tij është i vetmi në listën për kryetarin e ri të Partisë Demokratike. Duke anashkaluar komentin për procesin pa garë për kryetarin e ri, Berisha i fokusoi mesazhet e tij tek ajo, që vetë ai, e cilëson keqqeverisja e Edi Ramës. “Paraqitëm situatën dhe zhvillimet në vend, shkarjet e mëdha të Shqipërisë nën regjimin e autokracisë elektorale apo diktaturës autoritare të Edi Ramës, problematikat e mëdha që krijon në Shqipëri droga dhe narkoshteti, paraliza që i bën shtetit ligjor”. Gjatë vizitës në Kroaci, Berisha u takua me zyrtarët më të lartë të vendit, ku u shpreh se Partia Demokratike është e angazhuar në procesin e integrimit të Shqipërisë në Bashkimin Europian. “Diskutuam gjerësisht dhe ramë dakord për një bashkëpunim në rritje midis Partisë Demokratike dhe IDU-së në kuadrin e anëtarësisë në këtë organizatë që kemi. Në këtë panel pata rastin të paraqes angazhimin e madh të Partisë Demokratike për integrimin e Shqipërisë në Evropë si të ardhmen më të mirë të shqiptarëve”. Kreu i PD-së ndodhet në Kroaci për forumin e Unionit Ndërkombëtar për Demokraci.