Kreu i opozitës, Sali Berisha, akuzoi Edi Ramën se boshatisi vendin gjatë 12 viteve qeverisjeje. Në një takim me banorët e njësisë numër 5 të kryeqytetit, Berisha tha se Shqipëria po braktiset masivisht. “E lamë pushtetin në një Shqipëri, të cilës shqiptarët e besonin, në një Shqipëri në të cilën u kthyen 180 mijë shqiptarë në dy vitet e fundit. Në 12 vitet e pushtetit, Edi Rama largoi të rinj shqiptarë dhe qytetarë shqiptarë, nga viti 2014 deri në vitin 2023, sa asnjë pushtim që nga pushtimi otoman gjer sot, sa asnjë sëmundje, sa asnjë fatkeqësi. 1 milion e 99 mijë shqiptarë vetëm në hapësirën e Shengenit. Mbi 600 mijë të rinj. Miq, e rrokullisi kombin ky”. Me premtimin se do rikthejë shqiptarët në atdhe, Berisha theksoi se prodhimi “Made in Albania” do jetë shtylla e programit të tij. “Miqtë e mi, paketa e dhembshurisë është detyrim madhor moral dhe ligjor, por Made in Albania është shtyllë kryesore e programit tonë. Ne do bëjmë gjithçka që ju, që biznesmenët shqiptarë, që qytetarët shqiptarë, me iniciativën e tyre të lirë, të njohin vetëm suksesin”. Në mbyllje, kreu i opozitës përsëriti paralajmërimin e tij se do të shpallë organizata kriminale të gjithë ata që do tentojnë të prekin votat e 11 majit.