Gjysëmfinalja e kësaj të shtune në "Big Brother Albania" e përballi produksionin e Top Channel me një ngjarje të paprecedentë nga një lojtar i shtëpisë dhe të pandodhur më parë në asnjë edicion të këtij formati në vendin tonë. "Big Brother" si një eksperiment social është i ndërtuar mbi emocionin, debatet, shpërthimet dhe lojën e karaktereve të ndryshme, përfshirë edhe provokimin në limite, që për disa lojtarë është edhe arma kryesore që përdorin në lojë, por goditja që lojtari Jozefin Marku dha ndaj lojtarit Besart Kelmendi i njohur si Gjesti, kaloi çdo kufi të shprehjes hit brenda formatit “në kuadër të lojës". Shqiptarët, pavarësisht rrethanave të kohës, përshkruhen nga historiani Roberto De La Rocca si të ndjeshëm dhe impulsivë, të vrazhdë dhe të shoqërueshëm në të njëjtën kohë, të etur për të sqaruar se kush do të jetë kreu e kush pasuesi, më tepër njerëz të inatit se sa të mllefit, më tepër hakmarrës se sa mizorë. Rastet e dhunës në publik janë të shumtë në kohë dhe në kontekst. Atë e gjejmë në Parlament, në takime publike të politikanëve, protesta etj. Dhuna në Shqipëri është një fenomen kompleks që prek aspekte të ndryshme të shoqërisë, përfshirë familjen, arsimin dhe hapësirat publike. Jo pak njerëz të famshëm janë përfshirë në raste dhune, që kanë përfunduar edhe në dyert e gjykatave. Nga buron e gjithë kjo dhunë? Përse dhunuesi brenda pak orësh është rritur me mijëra ndjekës në rrjete? Kush kërkon të përçajë shqiptarët nga identiteti i banorëve të përfshirë në përplasje?