Qëndrimet e Athinës zyrtare, e cila prej muajsh po përpiqet që të bllokojë procesin integrues të Shqipërisë për shkak të mbajtjes në paraburgim të kryebashkiakut të zgjedhur të Himarës, Fredi Beleri, kanë marrë një përgjigje të qartë nga ana e Komisionit Europian që ka mbështetur punën e prokurorisë së posaçme anti-korrupsion. Eurodeputetja greke Anna-Michelle Assimakopoulou kërkoi sërish në KE që rasti Beleri të kthehet në një çështje europiane, pasi ai mbahet në burg padrejtësisht dhe se akuza ndaj tij për blerje votash nuk qëndron. Por këto pretendime të ngritura prej saj u kundërshtuan nga zyrtari i Lartë i Komisionit Europian Thomas Hagleitner. “Kjo çështje i takon drejtesisë, ne nuk komentojmë per çështje që janë në gjykim dhe për këtë çështje mbështesim SPAK-un”, tha Hagleitner, Shefi i Njësisë përgjegjëse për Politikat dhe Strategjinë Rajonale të Ballkanit Perëndimor, në Komisionin Evropian. Por nga ana tjetër, eurodeputetja greke vijoi të këmbëngulë se seancat ndaj Belerit janë të vonuara dhe se atij po I refuzohet leja për të bërë betimit. Madje ajo theksoi se kjo çështje është më e madhe se sa një grindje mes dy vendeve. Greqia është përpjekur shpesh që të ushtrojë presion për këtë rast, pavarësisht se dosja ndaj kryebashkiakut të zgjedhur të Himarës është në dorë të drejtësisë.