Fredi Beleri ka zemëruar edhe grekët këtë radhë. Vota e tij në Parlamentin Europian për të preferuarin e Elon Musk ngjalli reagimin e Eurogrupit të Demokracisë së Re. Ata kanë kritikuar Belerin pasi ka marrë një iniciativë që nuk përputhej me atë të eurodeputetëve të tjerë konservatorë të Demokracisë së Re. Në momentin e votimit për postin e zëvendëspresidentit në Komisionin Special "Mburoja për Demokracinë Evropiane" në Parlamentin Evropian ai ka vendosur që të votojë eurodeputetin qipriot Phidias Panagiotou (Fidias Panajotu). Edhe pse eurodeputeti qipriot humbi mandatin nga një kandidat i socialistëve, reagimet nisën shpejt si nga brenda partisë së Fredi Belerit, ashtu edhe nga eurodeputetët e partisë SYRIZA. Sidomos reagimet nga partia Demokracia e Re kanë qenë të menjëhershme pasi mënyra dhe veprimi i tij nuk u pranua nga deputetët e këtij grupi. Beleri në fillim I është përgjigjur reagimeve të eurodeputetëve të së Majtës greke me një postim të tij në rrjetin X ku shkruan duke justifikuar zgjedhjen e tij: “Unë zgjodha të mbështes deputetin e pavarur qipriot, Phidias Panagiotou, bazuar vetëm në origjinën e tij greke dhe asgjë më shumë”, ka shkruar ai. Por pak më vonë, pas votimit, ashtu siç shkruajnë mediat greke, filluan të mblidheshin “re” mbi partinë e të djathtëve grekë dhe eurodeputetja e Demokracisë së Re, Eliza Voseberg, Kryetare e Komisionit të Transportit dhe Turizmit mban distancë publikisht në X. Konkretisht ajo shkruan : “Propozimi i Fredi Belerit për qipriotin Phidias Panagiotou është zgjedhje e tij personale dhe nuk përshtatet në linjën politike të Eurogrupit”. Fredi Beleri reagoi sërish: “Dua të konfirmoj atë që thotë kreu i Eurogrupit tonë. Ishte një zgjedhje personale”. Ky “faull” i parë në eurogrupin e Demokracisë së Re nga Fredi Beleri është pasqyruar gjerësisht nga të gjitha mediat greke.