Presidenti Bajram Begaj dekretoi të hënë ndryshimet ligjore të ligjit për “Zonat e mbrojtura”. Për shkak të debateve të krijuara si dhe kritikave për këto ndryshime nga ana e disa organizatave mjedisore, Presidenca sqaroi se para se kreu I shtetit të merrte vendimin për ta dekretuar këtë ligj, ai u konsultua fillimisht me grupet e interesit por dhe ekspertë kushtetues. Sipas njoftimit, Begaj pasi mori në konsideratë pretendimet e grupeve të shoqërisë civile të cilat e shohin te ligji risk potencial për mbrojtjen e mjedisit, pasi dispozitat e tij mund të zbatohen në mënyrë të gabuar si dhe çështjen se përmes këtij akti ligjor mund të krijohet një përplasje me standardet e rrjetit ndërkombëtar të organizatave mjedisore atë të IUCN-së, konstatoi se një gjë e tillë nuk qëndron. Kjo pasi sipas presidencës, gjatë konsultimeve nuk u identifikuan përplasje dispozitash me asnjërën prej këtyre direktivave. Madje edhe për ekspertët kushtetues një pretendim I tillë nuk qëndron. Projektligji për ndërtimin në zonat e mbrojtura u miratua me 74 vota pro në Kuvend më 22 shkurt, u kundërshtua nga opozita dhe disa organizata të shoqërisë civile që kanë paralajmëruar se do e cojnë në gjykatën Kushtetuese. Ndryshimet ligjore do të bëjnë që në disa prej territoreve të klasifikuara si zona të Mbrojtura, do të mund të ndërtohen struktura akomoduese me qëllim zhvillimin e turizmit apo agroturizmit, por me kushtin që të mbahet një ekuilibër mes natyrës dhe aktiviteteve të zhvilluara.