Një çift nga Ohio, SHBA, ka sjellë në jetë një djalë të shëndetshëm të shtunën e kaluar nga një embrion i ngrirë për më shumë se 30 vjet – një rekord në historinë e ruajtjes dhe lindjes nga embrione të ngrira. Embrioni ishte ruajtur për plot 11,148 ditë, që nga viti 1994. Lindsey dhe Tim Pierce kishin vite që luftonin me infertilitetin, derisa iu drejtuan adoptimit të embrioneve – një praktikë që po rritet në popullaritet, sidomos mes komuniteteve me bindje të krishtera, që besojnë se embrionet janë jetë në zhvillim dhe nuk duhet shkatërruar. Embrionet u dhuruan nga Linda Archerd, tani 62 vjeç, e cila në vitin 1994 kishte përdorur IVF dhe kishte ruajtur katër embrione pas lindjes së vajzës së saj. Pas divorcit, ajo nuk i përdori më dhe për dekada ndjeu faj për fatin e tyre. Më në fund, përmes organizatës Snowflakes, që ofron adoptime të hapura të embrioneve, ajo i dhuroi ato çiftit Pierce në Tenesi. “Ndjeva gjithmonë se këto tre shpresa të vogla meritonin të jetonin, ashtu si vajza ime,” tha Archerd. Procesi nuk ishte i lehtë: kërkonte kontakte me klinikën e parë në Oregon, dokumentacion të vjetër në letër dhe transport të kujdesshëm të embrioneve në një klinikë në Knoxville, që njihet për ruajtjen e embrioneve të ngrira në enë të vjetra por funksionale. Nga tre embrionet e dhuruar, një nuk mbijetoi gjatë shkrirjes, dy u transferuan në mitrën e Lindsey, por vetëm një u implantua me sukses. Aktualisht në SHBA ka rreth 1.5 milion embrione të ngrira, shumë prej të cilëve mbeten në paqartësi ligjore dhe etike, veçanërisht pas një vendimi të Gjykatës Supreme të Alabamës në vitin 2024, që u dha status ligjor embrioneve të ngrira.