Shqipëria, Kosova dhe vendet e tjera të Ballkanit Perëndimor rrezikojnë të humbasin miliona euro nga Bashkimi Evropian. Komisionerja europiane për Zgjerim, Marta Kos, në një letër drejtuar gjashtë vendeve të rajonit, i paralajmëron se do të humbasin mbi 700 milionë euro nga Plani i Rritjes, deri në mes të këtij viti, për shkak të moszbatimit të reformave, shkruan “Bloomberg”. Letra e komisioneres Kos është dërguar në të gjitha kryeqytetet e rajonit, përfshirë Tiranën, ku iu kërkohet të gjitha vendeve të përshpejtojnë reformat e parashikuara në Planin e Rritjes, në mënyrë që të shfrytëzojnë plotësisht potencialin e kësaj pakoje financiare. Sipas burimeve nga Brukseli, të cilave iu referohet Radio Evropa e Lirë, Shqipëria rrezikon të humbasë 67.7 milionë euro nga fondet europiane, Kosova rrezikon shumën prej 68.8 milionë euro, ndërsa më shumë mund të humbasë Bosnjë-Hercegovina, vlerën prej 373.9 milionë euro.