Bashkimi Europian kërkon rikthimin e gjyqtarëve serbë në sistemin e drejtësisë në Kosovë. BE-ja shprehu “keqardhje të thellë” për vendimin e Këshillit Gjyqësor atje për të refuzuar tërheqjen e dorëheqjeve të gjyqtarëve dhe stafit serb, duke insistuar për lirimin e tyre nga detyra. Një vendim i tillë së bashku me largimin e mëparshëm të prokurorëve serbë, për Brukselin mund të jetë në kundërshtim me ligjin, procesin e rregullt dhe parimet e sundimit të ligjit. Sipas bllokut, këto zhvillime dëmtojnë karakterin multietnik të sistemit të drejtësisë, besimin e komunitetit serb dhe përpjekjet për integrimin e tij në institucionet e Kosovës. Në të njëjtën linjë, BE-ja u ka bërë thirrje institucioneve të Kosovës që të krijojnë kushtet për një gjyqësor që pasqyron diversitetin etnik të vendit, në përputhje me ligjet e Kosovës dhe zotimet e dialogut Prishtinë-Beograd. Vetë ushtruesja e detyrës së presidentes, Albulena Haxhiu, e ka mbështetur vendimin e KGJK-së dhe ka paralajmëruar lirimin nga detyra të gjyqtarëve serbë. Autoritetet kosovare argumentojnë se çështja duhet trajtuar mbi baza juridike e kushtetuese dhe jo si çështje politike. Gjyqtarët, prokurorët dhe stafi serb u larguan në mënyrë kolektive nga institucionet e Kosovës në vitin 2022, në kuadër të një krize politike dhe institucionale. Më vonë, udhëheqësit serbë bënë thirrje për rikthimin e tyre në institucionet e Kosovës, duke pranuar se largimi masiv kishte qenë një gabim.