Shqipëria hapi zyrtarisht grupkapitullin e dytë të negociatave me Bashkimin Evropian. Ky grupkapitull përfshin çështjet e “Tregut të Brendshëm” dhe është jetik për integrimin ekomomik të Shqipërinë në union. Nga Luksemburgu, ku u mbajt mbrëmjen e kësaj të hëne Konferenca e Katërt Ndërqeveritare, Komisionerja për Zgjerim e Bashkimit Evropian, Marta Kos, tha se do jetë avokatja më e mirë e Shqipërisë në Bruksel për anëtarësimin e plotë në 2030-ën, por kërkoi realizimin e reformave thelbësore, duke vënë theksin te lufta ndaj korrupsionit. “Integrimi për mua është më shumë se sa ti shtosh BE një vend, ajo ka të bëjë me bashkimin e Europës. Do donim të çelnim të gjithë kapitujt këtë vit dhe nga viti tjetër t’i nisim t’i mbyllim. 2030 është në rregull për anëtarësimin, por për ta realizuar këtë, angazhimet politike duhet të vazhdojnë, sidomos në zona kritike, si reforma në drejtësi, pavarësia e gjyqësorit, lufta kundër korrupsionit. Nëse Shqipëria realizon reformat, do jem avokatja juaj më e mirë në Bruksel”. Radosłaë Sikorski, Ministër i Punëve të Jashtme të Polonisë, e cila mban Presidencën e Këshillit të BE, e cilësoi jetik këtë hap të Shqipërisë drejt unionit. “Kapitujt që hapëm sot janë jetikë për integrimin ekonomik të Shqipërisë në tregun e brendshëm të Bashkimit Evropian. Reformat e nevojshme do të çojnë në përafrim ekonomik me BE-në, do ta bëjnë Shqipërinë më tërheqëse për investime. BE-ja është e ardhmja e mirë, e sigurt dhe e begatë". Ndërsa vlerësoi mbështetjen e presidencës polake dhe gjithë Bashkimit Evropian për integrimin e Shqipërisë në union, kryeministri Edi Rama ripërsëriti nga Luksemburgu vendosmërinë për hapjen e të gjithë grupkapitujve brenda vitit 2027. “Me Martën kemi rënë dakord për një agjendë ambicioze dhe po presim me padurim që të sigurohemi që të gjithë grupkapitujt të jenë çelur brenda 2027 me vendosmërinë tonë të plotë për të arritur këtë objektiv. Për Shqipërinë, anëtarësimi në BE është më tepër se një ambicie politike është një zgjidhje ekzistenciale jete”. Grupkapitulli i dytë i negociatave përfshin lëvizjen e lirë të mallrave, punëtorëve dhe kapitalit, lirinë për të ofruar shërbime, politikën e konkurrencës, mbrojtjen e konsumatorit dhe shëndetit. Në tetor të 2024-ës, Shqipëria hapi grupkapitullin e parë dhe më të rëndësishëm, atë të kapitujve “themelorë”, që prekin drejtësinë, administratën dhe shtetin e së drejtës. Ndërsa në dhjetor të po këtij viti u çel grupkapitulli për politikën e jashtme dhe sigurinë. Tashmë, Shqipërisë i mbeten edhe 3 grupkapituj të tjerë, konkurrueshmëria, Agjenda e Gjelbër dhe Qëndrueshmëria.